رساله من طفله عربيه في الصف الخامس

جهاد علاونه

الحوار المتمدن-العدد: 2663 - 2009 / 5 / 31 - 09:44
المحور: حقوق الاطفال والشبيبة
    

مرحبا يا (جده) أنا (نفين) إنت لسا ذاكريتني ؟ أنا الآن في الصف الخامس, وكل الناس بحكوا عني إني بنت حلوه إكثير وبجنن , وجارة مرت(زوجة) أبويه (بابا) بتحكي عني لبابا إني بجنن عدوينها , وبابا طبعاً برد عليها : بكره أول كلب بيجيني وبدق الباب بعطيه إياها , يلعنها ويلعن أمها , يعني من الآن بشبهوني بالكلبه , وأحيانا بس أمشي بسرعه بحكولي (مالك زي الكلبه إللي محروقه بالنار؟) أنا يا (جدتي) بضربوني بس أقوم من النوم , وبتمنعني زوجة بابا من حط الكحل على عيوني , بس لمعلمه في المدرسه بتحبني إكثير ومبارح إشترتلي بكله وربطة شعر بجننوا عدويني , مثل جمالي, وهاي الرسالههي اللي كتبتها وانا بس ببيض فيها وبضيف عليها .
كل الناس بحبوني , بس مش عارف ليش بابا وزوجته ما بحبونيش؟, بالرغم إني ما بزعل حدى منهم وببكي على الصمت وبقح على الصمت وأنا بنت صامته إكثير , مشان الله بدي حل .

اليوم إصحيت من النوم بكير إكثير عشان أهرب على السطح وأكتبلك هاي الرساله , مشان الله يا جدتي توخذيني من عند الوحوش بضربوني وبمسكوني من شعر راسي وبخبطوني بالأرض , وبعدين والله العظيم ما بقدر أطلع صوتي بعيط (ببكي) على السكت مثل موبايل مرت بابا إلحاطيته على الصامت .
أنا يا جدتي بحبك إكثير بعدين أنا ما راح أغلبك انا بصحا على المدرسه لحالي وبعمل لقمة أكل لحالي ,على السريع بعمل لفة زعتر أو جبنه , ودايمن (دائماً) بتخبيهن عني زوجة بابا وما بلاقهنش , وبنجبر أبقى في الجوع حتى أروح على المدرسه وآجي , والله إشي بجنن , وبفوت الحمام لحالي , يعني صدقيني ما هو إنت مضطره تعمليلي إشي من إللي بتعملهن الجدات أو الأمهات لبناتهم .

أنا مثل ما حكيتلك الآن بجلس على السطح وبكتبلك رسالتي رقم واحد , بدي أصير من هون وطالع أرقم الرسائل , بابا بحكي عني مجنونه وسقا الله وهو خلصان مني , وزوجته بتمتم في بطنها كلمات إكثير ما بفهم معانيها , بتحكي عني جمل ما بفهمها بس سألت عنها بنت الجيران إللي بتكبرني ب 4 سنوات فقالتلي إنهن كلهم بعنن أشياء عيب , يا الله شو بدنا بالعيب ؟
أنا يا جدتي تعبانه إكثير والله العظيم إني كنت حابه أعيش عندك بس بابا هو ما بدهوش على شانك حكيتيله بدك منه كل شهر ثمن لبسي وأكلي وشربي, وانت عارفه هو ما قبل وانت أيضاً ما إقبلتيش, انا بوعدك بكره بس أكبر أصير أشتغل وأعطيك بدل كلشي , انا تعبانه عن جد , بدي أنزل عن السطح هسع بكتشفوني , يا الله مع السلامه , بس بحياة الله لا تنسي تاخذيني.
زوجة بابا إمبارح كانت بدها تطفي السيجاره تاعتها في إيدي , ليش ما بعرفش ؟ بس والله وحياة الله ما إرتكبت أي شيء, الصينيه وقعت مني غصب عني , حطتلي كوم جلي إكثير وتعبت وانا أجلي , يعني لو كنت بنتها إبتعمل معايه هيك ؟ هاي بنت الجيران أكبر مني بخمس5 سنوات وأمها كل يوم بتعمللها الحليب , لسا إبترضع حليب , وانا حليب ماما ما ذقته من أول شهرين من ولادتي , يعني حتى اليوم ما حدى عملي كاسة حليب .
بحكوا في التلفزيون في إشي إسمه حماية الأسره روحي عليهم وخليهم يحموني , آثار التعذيب على جسمي , خايفه بكره أموت مثل بعض الأطفال بسبب العنف , هو يعني ليش الأب هيك ؟ أنا بستغرب جداً في أب بالدنيا ما بحبش أولاده ؟ أو في أب بالدنيا بحب أولاده إكثير زي بابا ؟لالا فيه , بابا بحب أولاده , بس أنا لالا ما بحبنيش عارفه ليش؟ على شان ماما إمطلقه , وبتحكيلي وبتناديني زوجته تعالي يا: بنت لمطلقه , قومي يلعن أبوكي يا مفضوحه , وسألت عن معنى هاي الكلمه وعرفت إنه معناها إشي بنقالش يعني إشي عيب .

انا عمري خمس سنين وأول جريمه برتكبها في حياتي هي إنها ماما إمطلقه , ليش الناس يا(جدتي) بطلقوا زوجاتهم ؟ إللي جمعه الله بفرقوه ,؟ ليش ما إنحب بعضنا البعض وأمي ترجع على دارها زي أول وتمشط شعري زي ما كانت زمان , والله العظيم شعر راسي مليان قمل , أنا عن جد إمقمله , لا بمشطولي شعري ولا بغسلولي إياه , ولا بلعب مع أولاد الحاره.
ماما كانت تربطه كعكه , وكنت تحكيلها إنه الكعكه حلوه عليّ إكثير , بس أنا شو بدي بالكعكه , أنا بدي أتحمم وأغتسل وأطلع للشارع وبدي أروح على مدرسه فيها صفوف ودروج حلوه وجديده , وثيابي إتكون كمان جديده , مش إيضلهن البنات بالمدرسه يضحكن على كُشة شعري الطايره بالهوي مثل إشوال خريس الجلي .

الناس بالحاره صاروا يحكوا عني إني بحكي جمل كبيره , وكلمات كبيره : ظلم ..تعسف..إضطهاد...عنف ضد الأطفال ..الإنسانيه ..الرحمه..العداله ..الأمومه ..أنا بحكي كلام أكبر مني بس صدقيني مش أكبر من الظلم إللي أنا فيه ,أنا طبعاً بحكي هيك بدون ما أشعر إنها كبيره أو صغيره , بس لازم ينتهي موضوع الرساله بيني وبينك , لازم تنتهي هذي الرساله بخاتمه جيده , بوعدك أكون عندك بنت مؤدبه ووفيه ومطيعه , ما راح أطلع فوق الكنبايات , ولا راح أنط إكثير وأعمل ضجه , شو يا (جدتي) إنسيتي إني صرت بنت إكبيره , انا الآن بالصف الخامس وصرت أفهم إكثير , يعني مش مثل أول , لما كنت أهرب منك وما تقدري تلحقيني , والله العظيم إني رايحه أكون بنت مؤدبه ومحترمه وما تعمل شيء يزعل جدتها منها , إنت بس إنسي الزعل إللي بينك وبين بابا , كل الناس إبتزعل منه مش بس إنت ,طبعاً ما عدى زوجته كلشس بدها إياه بجيبلها إياه , بس مش فاهم ليش بالرغم إنها مش بنته ؟ أنا مش عارف ليش بحب مرته إكثير بالرغم إنها مش بنته , أنا يا جدتي بنته ولازم يحبني أنا ويقف معي أنا ضدها , وهو بحكيلهم للي بحاولوا يتدخلوا بي :ما إلكوش يا جماعه الحق تتدخلوا بيني وبين بنتي , بس شو يا (جده) إنت لازم تتدخلي وبسرعه , خلص خلص بدي أنزل عن السطح هسع بعرفوا بموضوع الرساله .

إنتهت الرساله؟
لا ما إنتهتش الرساله

#جهاد_علاونه (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات