يا زقزوق صحى النوم

فتحى فريد

الحوار المتمدن-العدد: 2380 - 2008 / 8 / 21 - 09:37
المحور: العلمانية، الدين السياسي ونقد الفكر الديني
    

فى لحظة لا أعرف كانت متى ؟ أو كيف ؟ أو أين ؟ تقابلت مع أحد شيوخ وزارة الأوقاف ولكن لا تتعجل بالحكم فإنه مفاجأة إنه شيخ علمانى ينادى بالدولة المدنية الحديثة وسيادة القانون والحرية المطلقة وقصر دور العبادة على التعبد فقط والنصح والإرشاد لا المغالاه والتعصب يحلم بمصر لكل المصريين أقباط ومسلمين شيعة وبهائيين وملحدين ولا دينيين هذا هو الشيخ س م مواليد عام 64 تخرج من كليه أصول الدين جامعة الأزهر وتعين بعدها إمام وخطيب لأحد المساجد الكبرى بالقاهرة القديمة ولكنه للأسف يشكوا حاله لى قائلاً :
الشيخ س م : والله يا أستاذ فتحى إحنا حالتنا تصعب ع الكافر .
فتحى : ليه بس يا مولانا .
الشيخ س م : السيد المحترم وزير الأوقاف ناوى يخصم ال 100 جنية .
فتحى : 100 جنية بتاعت إيه ؟
الشيخ س م : أـصله كان ذودها من فترة بس حابب يرجع ف كلامه وكمان من فترة كدا حبه مشايخ بس على كيفك قول كدا حوالى 800 راحوا يقابلوا الوزير فقالهم أنا وزير ظالم وإللى مش عاجبه يخبط دماغة ف الحيط .
فتحى : طيب ليه متظاهروش هما سكتلوا ؟
الشيخ س م : ههههههههههههههههههههههههههه والله ضحكتنى وأنا مدايق يا أبنى مظاهرات إيه إنتا فاكر الشيوخ دول من بتوع يسقط مبارك وكفايه وكدا ولا إيه ؟ لا خالص دا الخروج ع الحاكم عندهم شرك .
فتحى : يا صلاه النبى أحسن أستنى بقا أعد فيه كام مشرك ف مصر !
الشيخ س م : طب أقولك بقا على تقسيمة الشيوخ ف مصر عاملة إزاى بص يا سيدى أولاً ما تبقا من الجماعة الإسلامية ودول منتشريين فى أقصى الصعيد والمدن الريفية البعيدة ونسبتهم حوالى قول كدا 20 % أما بقا شيوخ الأخوان فدول مجمعين بكثرة فى المدن الساحلية والسلفيين واكلنها والعه ف الباقى أما إللى ذى حلاتى كدا ملهوش ف البطيخ يجوا مثلاً حوالى 5% يعنى الدنيا بوظة والحمد لله الذى لا يحمد على مكروه سواه .
الشيخ س م : فتحى فتحى إنتا يا عم متنح كدا ليه ؟
فتحى : يا مؤاخذه يا مولانا معلش بس اصل دماغى فتحت منى ومن إللى بتقوله .
الشيخ س م : ما أنا قولتلك من الأول إن حالتنا تصعب ع الكافر وطبعاً إحنا مرتنبا حوالى 200 جنيه + العلاوة بتاعة الإضراب ال 30% + حوافز تيجى ب 40 جنية + ال 100 إللى هتتحذف يبقا بالصلاه على سيدنا النبى كدا يا عمنا 425 أو 450 مش فاكر .
فتحى : طيب ما تضربوا عن العمل ؟
الشيخ س م : ههههههههههههههههههههههههههههههههههههههههههههههههههههههههههه
لا أسكت مش قادر هموت من الضحك يعنى عايزنا نمتنع عن صلاة الجمعة مثلاً علشان يزودونا ولا إيه حكايتك ؟
المهم بس يا فتحى لازم الناس تأخد بالها من الموضوع ده علشان إللى مش بيقدر ع المصاريف مش قدامه غير حل واحد إنه يمد إيده ويا أخذ من صندوق النذور ويا إما بقا ياخد التمويل إللى بيجى من أى حته بقا ومحدش بعد كدا يشتكى من الوهابية ولا من التطرف ولو شوفت زقزوق إبقا سلملى عليه .
وهنا إنتها بيننا الحوار وصار كلاً منا إلى حال سبيله ينظر ويتأمل إلى ما أل له رجال الدين أفكر وأتدبر أمرى ما هو المصير لو قبل هؤلاء الناس التمويل القادم من أى حته ذى ما قال عم الشيخ إللى هيحصل إيه ؟
شوفت الدنيا ف اللحظة دى سودة قوى ومفهاش أى ألوان كلها أسود أسود غامق وفى النهاية قررت إنى أكتب وأقول لمعالى وزير الأوقاف صحى النوم يا زقزوق بدل ما تخبط دماغك ف الحيط

#فتحى_فريد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات