بـرنـامـج الـعـجـل وقـع

جلال عامر

الحوار المتمدن-العدد: 599 - 2003 / 9 / 22 - 05:21
المحور: اخر الاخبار, المقالات والبيانات
    

هي: حضرتك احكي للسادة المشاهدين إمتي فسدت وإزاي ريحه جنابك طلعت.
هو: أنا فسدت في اليوم التالي لصدور القانون رقم 43 لسنه 1274 بتاع الانفتاح وريحتي طلعت إمبارح.
هي: علشان كده قبضوا عليك؟.
هو: إطلاقاً ده السبب بذرة عنب... لأنهم كانوا بيراقبوا مواسير الصرف الصحي بتاعتي في مارينا وأكتشفوا وجود بذرة عنب فعرضوها علي الفكهانيه وفي التليفزيون وبعد شهر إتعرف عليها صدفة فكهاني من بولاق الدكرور وقال دي بذرة عنبة من عنقود قفص دكاني وأشتراها مني المدعو "حلقولو وحموه المَّنيل" ورقم بطاقته 32457 بدل فاقد شبرا وأمه إسمها "زمعه" وساكن في الدور الخامس في فيلا من دورين بحي الجربانين.
هي: فطبعاً جم وقبضوا عليك؟.
هو: أبدأً... ماعرفونيش برضه لأن الوزير كان راضي عني ومن يومين الوزير قاللي: "أنا زعلان منك", فعرفوني على طول وسمعوني أغنية "سجنوني ورقوا الوزير".
هي: أعتقد كل حاجة كانت متسجله صوت وصورة .
هو: طبعاً... والحقيقة المونتير بذل مجهود كبير علشان يحذف صورة الوزير وبقي الوزير يظهر في الكادر كأنه فازة كبيرة ولما كان ياخد مني حاجة يظهر في الصورة وكأني برمي حاجة في الفازة وإن كان بعض الناس لاحظوا إن الفازة بتتكلم وبتقول "وأنا ياعمو".
هي: وما تعليق سيادة الفازة أقصد الوزير؟.
هو: الوزير ماعلقشي الوزير إترقي بس... لأن القانون صريح أى وزير يمسكوا الراجل بتاعة يترقي بس مايعلقشي ولو علق يتعلق.
هي: تحب تقول حاجة في نهاية البرنامج.
هو: أحب أقول لبنتي "الباتعة" ومراتي "صبحية" أنا مش فاسد أنا مرتشي بس وأوعي تخجلي من بابا, و أرفعي رأسك فوق. قدام الكومودينو حتلاقي صورة وراها خزنة فلوس والباقي في المراتب.
هي: ألف شكر يا أفندم.
هو: العفو يا بنتي... وإلى اللقاء في أثينا.. وتحياتي للفازة أم كرفتة.                                                

#جلال_عامر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات