ميسون نعيم الرومي
الحوار المتمدن-العدد: 5905 - 2018 / 6 / 16 - 22:46
المحور:
الادب والفن
عطشانه السواجي اسگيهه مي العين
من روحي نبع يضوي على الشطين
يادجلة اوفرات العذب بيه الماي
نجمه وي گمر وامطرزه الجرفين
جوري الورد نعناع ويه الياس
يتمايل غنج ويعطر الجنبين
يتهاده البلم محله العتابه اوناي
والنسمه سحر واتغازل الخدين
والطين الحمر ياقوت وي مرجان
حنـَّه للعرس وايحني بالچفين
تركعله الشمس تغسل ظفاير بيه
يا مي الفرات امن الجنه مي العين
ون گلبي جرح يبچيك هم تبچيه
والنخل انذبح ياحيف العنب والتين
خنجرهم غرز يذبح جمال البيك
يادجلة عشگ يا غنوة الطيبين
اهوار التراث العطش طگهه الموت
يادجله اوفرات الغدر واصل وين؟
أسمع للنخل والصوت وا ويلاه
حاني رگبته والفاس بالجنبين
ذله والمهانه اشلون تحمل ليش
يعراق انتفض السكته للمسكين!
السكته للمسكين
-----------------------------------
#ميسون_نعيم_الرومي (هاشتاغ)
كيف تدعم-ين الحوار المتمدن واليسار والعلمانية
على الانترنت؟