ما بين لبارح و ليوم

ما بِين لبارح و ليـوم (*)

اش جرى و طرا
ف بلاد تِّيه و لحقْرا
ولينا عايشين بحال لإَحنا ف غٌربة
ليسارين ما بِين لبارح و ليُوم ب 180 درجة دارو دُورة
لبارح كانو كايتقدمو لِِحتجاجات
كُلُّهم شَجاعة يواجهو لمخزن بلحناجر و شِّعارات
يِطالبو بلكرامة و لحُرِّية
يِطالبو بدِّيموقراطية و سُّلطة شِّعبية
يِطالبو بلعَدالة و رَدم لـفوارق طَّبقية
بـمجالس لَبروليتاريا و لعمال زِّراعيّين
و طَّلبة و لـفـلاحين و لمثقفّين ثَّوْريين
تحت رَّاية لحمرا لحزب ماركس و لينين
لٍيوم وَلاَّو ورا لِحتجاجات لـمطلبية لَبسيطة
ف شُّغل و تَّطبيب و طريق و لما و ضُّو بـفاكتورات معقولة
متوارين و من لمخزن خايفن
و ورا تبريرات واهية مَتمَترسيـن
كايشوفو فكل حراك يِدِّين صَهيونية
ما كاين لا حتِجاجات سلمية وَلا ثورة شعبية
كل ما فلأمر دول كُبْرى باغة تخلق لـفَـتنة و كِيّانات طائفية
هنا و هناك فلمنطقة لي كايسموها بلـعربية
اي شَّرق لأوسط و شمال أفريقية
صحراء لَعرب و لَهــلال لَخصب و لْأرض لأمازيغية
نْساو لـمـبادئ و كُلهم خَلعة
ولاو كايشوفو تحث كُل حجرة لَفعة
و شِعارهم شوف و سكت
ما تهضر على حراك وَلا تحتج ما تكتب ما تنَكت
و هاذ شّي هو لي كايألَّمنا فهاذ لوَقت

هاذ شي را غير بسباب غيرتنا على ليسار (**)
لي ناسو نـساو تـضحيات سعيدة و رحال و عمر
و شْهادة زروال و اشباضة و التهاني(***) و جميع لأحرار
بــغيــنا يــسار حقيقي شُجاع و قــوي
و صَـوتو وسط لـكادحين عالي يدوي
لاخوف من لمخزن وَلا حــنيــشاتو
وَلا من زَّرواطو وَلا من حـباساتو...

_________________

(*) عنوان مستعار من أُغنية للفنان المغربي سليم الهلالي
(**) ليسار لي كايصنف راسو ماركسي ثوري او جدري. هنا لا يهمنا "اليسار" لمخزني و الانتهازي
(***) شهداء الحركة الماركسية سعيدة المنبهي، رحال جبيهة، عبد اللطيف زروال، عبد الحق اشباضة، أمين التهاني وبلهواري مصطفى، بوبكر الدريدي.... وآخرون.....