سليمان خاطر

راجي مهدي

الحوار المتمدن-العدد: 5237 - 2016 / 7 / 28 - 13:15
المحور: الادب والفن
    

الوطن .. حلم بكرة

اللي شبه الوهم

سكر جوة حلقك مر

الوطن اللي وجهه جهم

بنحلم يبقي وطننا وحر

هز البنادق هز

الموت لجل بلدنا عز

واللي خان خطوتك

بكرة الحساب يحضر

لما الرصاص هايئز

يا جندي خطوتك

قيدها اللي ع الصاري

أخدوه من وسطكم

رقوه خلوه قبضاي

ومش داري

بهم الغلابة ف الحواري

ف الغيطان والمصانع

وبهمكم يا جندي ف البراري

هز البنادق هز

دي رقاب مصيرها الجز

ولإمتي يا دفعة

تخدم ف عالم غُز

يا دفعة يا جاري

يا أخويا ويا صاحبي

علموني أحب الجيش

من وأنا باحبي

وكبرت يا دفعة

قالولي حماة الوطن

وافقت وقلت أمين

بس إيه الوطن؟

يحموه لمين؟ من مين؟

الوطن يا دفعة

تكية الخاينين

الوطن يا دفعة

قالبينه سلخانة

فيها الفقير مدبوح

حاوطوه بسجانة

حب الوطن يا دفعة

بقى تهمة وخيانة

حب الوطن يا دفعة

مش بس بالشعارات

وأما سليمان خاطر

صدق وصان الوطن

طب ف ساعتها ومات

سليمان اتغبن يا دفعة

فحاسب من القيادات

سليمان قالوله

إسرائيل العدو

وسليمان والله

ما كانش عايز قول

فتى أسمر نحيل

جسده اتغزل ع النول

جاي من الشرقية

كان أى زاده الفول

وكان قنوع زينا

وع الرضا مجبول

العسكرية شرف

منه سليمان هاينول

جيشنا يعادي العدو

فيه العدو ما يطول

وياعيني عليه سليمان

دخلوا لقوه مقتول

ف زنزانة كئيبة

جدرانها متعتمة

تشبه ليالي الوطن

وبلدنا متيتمة

مرمي سليمان ف الأسر

لجل إنه صان أرضه

لما اليهود دخلوا

واتطاولوا على عرضه

شد ع الأجزاء وحذر

لم يستمعوا العدا

قام نفذ ندا بلده


وسنته وفرضه

فرغ رصاص عهدته

حكم ورفض نقضه

واتجندلوا الأعداء

ف دماهم جثث هامدين

مشهد يسر الشهيد

عنه الرجال يرضوا

ويفزعوا الخاينين

من مرجلة سليمان

الفعل زي النار

هايحرر الأوطان

ويهز عرش الليل

والظلمة والكهان

لو سليمان بقى مثل

ينحرر الجدعان

فخلوا سليمان عِبرة

يشيب لها الولدان

حاكموه علي بطولته

واعتذروا للعبران

ورموه ف زنزانة

وجهزوا الأكفان

وف ليلة ذليلة عليلة

فيها القمر ما يبان

والوطن مفزوع

من زعقة الغربان

والبوم يطيح ف الليل

يخنق الجدعان

دخلوا عليه الديابة

سجان ورا سجان

حاصروا الفتي الأسمر

أخضر البنيان

شنقوه ف ليل الوطن

جففوا الشريان

وقيادته لا نطقت

ولا جالنا منها بيان



يا دفعة إسرائيل العدو

مهما كانت قيادتك

دايسة ف التطبيع

كل الكبار عندنا

شطار أوي ف البيع

وإن خانوا دم اخواتك

ف أكتوبر و في يونيه

وإن سلموا حلمنا

وطاطوا للدنيا

هاتفضل إسرائيل العدو

وحتما ف يوم فانية

حاسب أوي م الزيف

الكدب ف بلدنا طاعون

شد بإيديك ع السيف

وطنك عليك مركون

وإن هانوا ف المجلس

اصمد وإوعى تهون

وإن كان يا مصر الوعد

إن يحكموكي الدون

ويسمموا بدنك

زي الوبا الملعون

و يشيدوا لينا

بدل المصانع سجون

ويزرعوا أرضك

مش قمح لا أفيون

برده يا مصر الوعد

الدم ليكي يهون

نقوم عليهم قومة

تتعدي كل قانون

ولا يبقي منهم نفر

علي وجه هذا الكون

كل اللي باعونا

طبقة كلاب صهيون..

#راجي_مهدي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات