ليش قطر ما بتحارب مع الفلسطينين

جان نصار

الحوار المتمدن-العدد: 4528 - 2014 / 7 / 30 - 12:41
المحور: كتابات ساخرة
    

في الواقع يا جماعه انا مش من دعاة انو حد يحارب عننا احنا الفلسطينيه وكمان ما بأمن بتصدير الثروات(عفوا الثورات) بس اللي مزعجني هدوال اللي بحمسو حماس علشان تتحمس اكتر من ما هي متحمسي.
على فكره انا مش ضد حماس كفصيل مقاوم وبتصدى للعدوان الغاشم والمجرم ضد ابناء شعبنا بس بقهرني وبفلقني وبعصبني وبفقع مرارتي هو العنتريات والمزودات والهوبارات والهوشات والزعبرات على حساب الابرياء والمساكين والفقراء لانه نسبة الفقر في غزه تحت الخط الاحمر بحولي 100 درجي.
اكيد مش راح اقول عند تعرض غزه للقصف والغارات انو نفتح الشماسي بل اني ابارك لكل مقاوم ومدافع ومتصدي لهذا العدوان. ومع هيك كقيادي ومسؤول مش لازم اخد شعبي الى التهلكه جكر(نكايه) وتهور واستهتار وصولا للانتحار مشان عيون الاخوان في مصر وتلبية رغبات تركيا وقطرلانه اللي ايدو بالنار مش زي اللي بتفرج عليها واللي بوكول العصي مش زي اللي بعدها.
بقولك عند هبوب العاصفه انحني وما تكسر ظهرك واذا الخطر اجا حاول انك تتطلع بأقل الخسائر .
اسى وهلئ وهالحين مين اللي بدى اسرائيل ولا حماس بعد العدوان ما اظنش راح تفيد لانو الفاس وقع بالراس ودافع وقاوم ومع هيك اذا بتقدر تساوم على الحفاظ على ارواح شعبك هاي مسأله كتير مهمي وانك تتطلع باقل الخسائر هي مهمتك كقيادي بدون مغامرات ومقامرات وتخمينات .
كان في هناك مبادره مصريه وعشانها سيسيه مش اخوانيه رفضتوها يا حماس بتحريض من تركيا وقطر مع العلم انكم في عام 2012 نفس المبادره كانت من مرسي والاخوان ووفقتوا عليها زي التيتي وكنتوا طوال العام شاطرين ومطيعين على الامن محافظين ومش متشرطين وقلتوا امين.
احراج السيسي وفزعه للاخوان ما جابو هدؤ وامان ونص الشعب المصري بتشفى فينا كمان .
منيجي لقطر انا مش فاهم شو عاصص على ذنبها بدها تناطح مصر على حساب شعبنا .
بنزل اخونا مشعل باليموزين وبركب سياره تمشي على الغاز مش بنزين وبطلع على الشمال واليمين وبمر جنب اكبر قاعده للامريكين لتحمي احبابنا القطرين وبوصل فضائية الجزيره قادما من الفيلا وبطرقنا خطاب مزودات وعنتريات ورفض لكل المبادرات اذا لم تستجب اسرائيل للشروط و والاملأت.
كان عدد الشهداء عددهم حوالي مئتين و20 شهيد وفي دمار بربع غزه وطبعا نقف اجلالا لهولاء الشهداء وكنا نتمنى ان لا يسقط ولا شهيد ولا حتى جريح.كان بالامكان تفادي اعداد الشهداء اللي وصل الى اكثر من 1250 شهيد حتى هذه اللحظه وما يفوق على 6000 جريح ودمار لاكثر من نصف غزه ونزوح وتشريد اكثر من300 الف نازح
نعم ان من قتل ودمر هو اسرائيل المعتديه وليست حماس وبعيدا عن العواطف واللطم والعويل ان عناد وغباء ونكايه ومقامرة حماس كانت احد اسباب الاستمرار بهذا العدوان المسعور وزياة اعداد الشهداء والدمار والخراب والنزوح.
كم كنا نتمنى ان نسمع حماس او فتح او منظمة التحرير او قيادي مسؤول وبهذه الحاله قيادة حماس ان تملك الجرائه والشجاعه لتقف وتكاشف وتصارح وتعترف وتنتقد نفسها وتقول اننا اخطائنا في تقدير ردة فعل اسرائيل او اخطأنا في حجم الخسائر او تهورنا ورفضنا وقف النار لنتفادى هذا الكم من الخسائر او اننا صعدنا الى الشجره ولم نتمكن من النزول وماعرفناش.
مره واحده على الاقل يكون في نقد ونقد ذاتي وانوالقطرين والاتراك عبولنا راسنا وشوشو افكارنا وقامروا وغامروا على حساب شعبنا.
اوباما بقولك انو قطر وتركيا ممكن يهدوا اللعب ويحطوا(يضعوا)تصوراتهم وثقلهم ورغباتهم ومصالحهم للتهدئه وهم جماعه موثوقين.
عال ليش ما يحاربوا معنا القطرين بدال ما انهم دية الشهداء دافعين بالملاين ومش مهم عدد الشهداء المساكين لانهم على الجنه طالعين .يعني الامير تميم شو كتير حليم على الاقل مره روح لحليفك الاكبر امريكا واخبط(اضرب)على الطاوله وقول لاوباما لهون وبس احنا محتج على عدوان اسرائيل على غزه وبدنا انعقاد مجلس اللمم وكمان بدناش قاعده امريكيه على اراضي قطر ومنستنكر سياسة الكيل بمكلالين يا نور العين.
قطر اليوم لاعب رأسي قي خلق الفوضى الخلاقه في منطقة الشرق الاوسط اكيد مش عميل للامريكان لانو اصابعهم وبعبصاتهم (عفوا بصاماتهم) في مصر وسوريا والعراق وفلسطين مرورا بلبنان والاردن وليبيا وتونس وصولا الى فريق سان جيرمان باريس.
تركيا هي الاخ الاكبر لقطر وقواعد الناتو ودعم الامريكان مش ممكن يزعلوهم رغم كل الجعجه والطحن اللي منسمعوا بدهم يتزعموا العالم الاسمي السني .
ياريت نشوف مجاهدين قطر وتركيا على اراضي غزه بدافعوا عنها.
واللي بتخطخ وبجعجع وبتبجح وبقولك مش مهم قديش منا يموتوا يموت هو اول واحد وما يقرر عن غيرو . لان حياة الانسان هي اغلى ما نملك
ختاما معقول الاستهانه بأروح البشر والحجر فقط لغايات ومكاسب سياسيه.
نستنكر ونشجب العدوان الاسرائيلي الغاشم على الابرياء في غزه لان الدم الفلسطيني ليس ارخص من الدم الاسرائيلي
اذا كانت اسرائيل تريد السلام لتفعله وتقوم بخطوط جاده لتحيق ذلك

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات