خر كدبه من بطولة الإخوان المسلمين

آامبارح .. اتفرجت على الفيلم الكوميدي الرائع "آخر كدبه" .. لكن بنسخيتن مختلفتين.

النسخة الأولى كانت هي الأصلية القديمة بالأبيض والأسود .. بطولة فريد الأطرش وسامية جمال واسماعيل يس وعبدالسلام النابلسي.

وفي الفيلم .. المفروض إن النابلسي بيشتغل مندوب مبيعات لشركة تأمين على الحياة .. وصادف سامية جمال عند الأسانسير .. فقرر إنه يبيع لها بوليصة تأمين على الحياة .. فراح قايلها بكل جدية النابلسي:

"حياتك يا هانم هي أهم شيء في الوجود .. ولو فقدتي حياتك .. ح تعيشي من غير حياة!"

ساعتها ما قدرتش .. ومت على نفسي من الضحك.

لما قلبت القناة ..

لقيت قيادي من الإخوان المسلمين اسمه أحمد أبو بركة، بيتكلم بكل جدية عن هوية الأمة الإسلامية، وبيقول ما معناه:

"الهوية الإسلامية هي أهم شيء عند المجتمع .. ولو المجتمع فقد الهوية الإسلامية .. ح يعيش من غير هوية."

ساعتها حسيت إن دي نسخة جديدة من فيلم أخر كدبه .. لكن المرة دي من بطولة الإخوان المسلمين.

نفس طريقة البيع الكوميدية بتاعت عبدالسلام النابلسي .. نفس "الكاراكتر" (الشخصية) .. وش جد جدا .. بتقاطيع حادة ومتماسكة .. لكن بيقول كلام بيضحك جدا.

القيادي أحمد أبو بركة فيه شبه رهيب من عبد السلام النابلسي

ويمكن علشان كده هو من أكتر الوجوه الإسلامية قبولا في البرامج الحوارية .. وأنا شخصيا بأحب أتفرج عليه وهو بيتكلم .. وأعتبره أفضل شخصية مريحة ومقبولة في التيار الإسلامي بشكل عام.

بس ما كنتش واخد بالي إن السر .. هو التشابه العجيب بينه وبين عبدالسلام النابلسي.

فالقيادي أحمد أبو بركة عنده نفس تقاطيع وش عبدالسلام النابلسي الوسيم .. وكمان نفس جديته وعصبيته .. ونفس دماثة الأخلاق بتاعت النابلسي .. ونفس طريقة الإلقاء المتمكن من اللي بيقوله.

لكنه في الآخر للأسف .. بيقدم برضه نفس فقرة البيع الكوميدية بتاعت النابلسي:

"لو فقدنا الهوية الإسلامية .. ح نعيش من غير هوية."

عشان كده لازم المجتمع يشتري بوليصة تأمين على الهوية الإسلامية.

منين؟؟

طبعا من (شركة) الإخوان المسلمين.

ظريفة جدا الحكاية دي .. لأنها بتحسسك إن الدنيا في مصر ما اتغيرتش كتير .. لا في الإعلام .. ولا في السياسة .. ولا في التفكير ..

وده بيثبت إن هوية المجتمع المصري .. لسه زي ما هي.

الفرق بس .. إننا بدل ما كنا بنضحك على الأفلام زمان .. بقينا دلوقتي بيضحك علينا في الواقع.

المفروض إن الهوية هي: الحياة الثقافية والنفسية للمجتمع. يعني مش ممكن شعب يكون عايش من غير هوية.

فلما حد يطلع لنا في التلفزيون ويقولنا إن" "الهوية أهم شيء في الوجود .. وإننا لازم نحافظ على الهوية .. وإلا ح نفقد الهوية .. ونعيش من غير هوية"

ساعتها لازم نضحك عليه .. ومنخليهوش هو اللي يضحك علينا.