كشيت ملك

سليمان الزهيرى

الحوار المتمدن-العدد: 2407 - 2008 / 9 / 17 - 03:39
المحور: الادب والفن
    

كشيت ملك
وبقيت مواطن تعدادات
مش فارقه ويايا الهموم
أصحى من النوم كل يوم
أبو نص فول ألقاه يدوب على قد تغميسه رغيف !!
ينحط صدري حطة الريح اللي بتموت ع الرصيف
........... كبر بقى
هى كده أحلوت قوى
سيبك بقى من قلبة المخ اللي بترج الدماغ
وإستحمل العيشة اللي تقطم أى ضهر
وإرضى بقى بعيشه ماهش ولابد ف أخر كل شهر
وإمشي مع الثورة ولكن في الحرام..
صهين وفوت هي يعنى جت عليك
ما الناس بتاخد فوق دماغها كل يوم
وبتدرع الكوته وماشيه ف قهر عوم
صايمين نهارهم لأجل هدمه للعيال
ومكملين باقي عشاهم نوم
بيفلوا في دفاتر قديمه من زمان
ومتقيين الصبر لما الصبر شاخ
رافعين إيديها لفوق... وروسهم في السباخ
ومصدقين والزن زى السحر داير ع الودان
كشيت ملك
وبقيت مواطن زنبلك
أجى أقول يسقط .... أخونى وأقول يعيش
اجى أقول العيشة ضنك ..... أقول اهى أحسن مما فيش
الخير كتر وأنا ما أحتكمش ف جيبى غير على مامعيش
كشيت ملك وبقيت مواطن زنبلك
حتة رقم مرمى فى سجلات الحكومه وسط كام مليون رقم
مايهمهمش الزيت هيبقى بكام جنيه
ولا حبه الرز ف بلدنا بتغلى ليه
ويهمهم كاس الأمم !!
كأس الأمم!!

#سليمان_الزهيرى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات