العروسة المحشورة

أيمن غالي

الحوار المتمدن-العدد: 5984 - 2018 / 9 / 4 - 08:46
المحور: كتابات ساخرة
    

أخد العروسة و عمها معاه فى عربيته لتوصيلهم إلى حفل زفاف العروسة، و لتوصيلها للعريس إللى قاعد مستنى على نار .. و فى السكة وشوشت العروسة عمها ..
● إزاى يا بنتى و فين و إمتى ؟!! إنت كده حا تتسببى فى مشكلة كبيرة
○ مش ممكن أروح الفرح .. مش حا أقدر
■ يا جماعة خير ؟ كفى الله الشر .. ده ميعاد الفرح قدامه دقايق و لو فيه أى مشكلة ممكن تتحل، و أكيد المشكلة بسيطة، و مصارين البطن بتتخانق .. يعنى عدوا الليلة على خير، و بعدين تتصافوا
● لازم تتصرف يا عمو
○ مش ممكن يا بنتى .. إزاى فى وقت زى كده ؟! ما كانت الفرصة قدامنا إننا نتصرف .. لكن جاية قبل ميعاد الفرح بدقايق و تقولى الكلام ده ؟!! إنت كده بتحرجينى يا بنتى
■ يا جماعة إستهدوا بالله .. و أى مشكلة ممكن تتحل .. بس ما فيش داعى تضايقوا المعازيم و تبوظوا الفرح
○ دى كارثة مالهاش حل
■ يا خبر أبيض .. ليه كده بس ؟!! لا حول و لا قوة إلا بالله .. أكيد كل مشكلة و لها حل
● أكيد الأستاذ حا يعرف يتصرف يا عمو
○ يا بنتى كده حا نحمله فوق طاقته
و ما بين شد و جذب و محاولات الغلبان إللى إتورط فى مشكلة مش بتاعته و من باب مجبر أخاك لا بطل؛ إضطر إنه يشيل مسئولية حل المشكلة
■ شوفى إنت زى أختى و لازم أساعدك و ما تغصبيش نفسك على حاجة أنت مش عاوزاها .. و مش مهم العريس و الفرح و المعازيم المهم سعادتك
● إهئ إهئ إهئ .. آااااااه .. مش قادرة أستحمل .. مش ممكن
■ بلاش تغصبها حضرتك على حاجة هى مش قابلاها و كل حاجة بالخناق إلا الجواز بالإتفاق ..
○ يا أستاذ البنت مزنوقة
■ و إيه إللى يزنقها ؟! يعنى كان العريس إشتراها ؟ و لا ماسك لها زلة ؟!!
○ يا عم البنت مزنوقة .. عايزة تدخل تواليت
■ نهار إسود و مهبب .. إزاى ؟!! ده إحنا دفسناها فى العربية بفستانها بالعافية .. حا تنزل إزاى و حا نركبها تانى إزاى و حا نوديها تواليت فين هنا ؟ ده فسخ الجوازة كان أسهل
و الغلبان الموروط عصر نافوخه و إفتكر نايت كلوب كان بيروحه .. و وصل عنده و نزل و إتكلم مع المسئول و شرح له الموقف و طلب السماح للعروسة بإستعمال التواليت .. و أولاد الحلال شدوا العروسة و خرجوها من العربية .. و دخلت التواليت .. و مرت الدقايق ساعات على الأخ الموروط و حرق له علبة سجاير فى نص ساعة و العروسة فى التواليت ..
و مسئولى النايت كلوب دماغهم جابت و ودت، و الموروط بيحرق فى السجاير، و عم العروسة بيبص فى الساعة، و أخيرا سمعوا صوت صويت العروسة
● إلحقووووووووونى
○ خير يا بنتى ؟
● أنا إتحشرت يا عمى .. أنا محشورة
التواليت كان على مقاس البنى آدمين مش على مقاس فساتينهم ..
○ إكسروا الباب .. إكسروا الحيطة .. البنت محشورة

حدث بالفعل

#أيمن_غالي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات